Շարունակում ենք քննարկել DR KPI-ների օպտիմալացումը։ Դրանք այն չափանիշներն են, որոնցով Դուք գնահատում եք աղետներին Ձեր պատրաստվածությունը։
Նախորդ մասում, որը նվիրված էր RPO-ին, խոսեցինք վերականգնման կետի նպատակային արժեքը բարելավելու ուղիների մասին։ Այս մասում կներկայացնենք վերականգնման ժամանակի նպատակային արժեքի (RTO) օպտիմալացման ռազմավարություններ։ Ահա մեր խորհուրդները։
1. Փաստաթղթավորեք ամեն ինչ
Կանխարգելիչ մոտեցում ունենալու համար փաստաթղթավորեք թե՛ Ձեր համակարգի, թե՛ տվյալների վերականգնման գործընթացի բոլոր կողմերը։ Ձեր ինժեներները չպետք է ստիպված լինեն միջադեպի ընթացքում որոշել, թե ինչ անել։ Նրանք պետք է կարողանան պարզապես պատճենել անհրաժեշտ հրամանները DR ընթացակարգի փաստաթղթից։
2. Ներդրեք մոնիթորինգի համակարգ և ունեցեք աջակցման թիմ
Ինչպե՞ս սկսել վերականգնումը, եթե չգիտեք, որ ինչ-որ բան խափանվել է։
Ինչպե՞ս սկսել վերականգնումը, եթե չունեք տեխնիկական մասնագետներ, որոնք այն կիրականացնեն։
Ինչպես արդեն նշել ենք, մոնիթորինգն ու աջակցությունը վերականգնման ցանկացած գործընթացի անհրաժեշտ հիմքն են։ Համոզվեք, որ ունեք համակարգ, որը հետևում է ամեն ինչին, ինչպես նաև թիմ կամ մասնագետ, որը կկատարի բուն աշխատանքը։
3. Օգտագործեք ռեպլիկացիայի և վերահամաժամեցման տեխնոլոգիաներ
Սա նույն խորհուրդն է, ինչ նախորդ՝ RPO-ին նվիրված մասում։ Եթե կարող եք պարզապես անցնել աշխատող պահուստային ենթակառուցվածքին, ժամանակ չեք կորցնի պահուստային պատճենից վերականգնման վրա։
4. Ավտոմատացրեք
Ավտոմատացումը գործառնական արդյունավետությունը բարձրացնելու և բիզնեսի անընդհատությունն ապահովելու լավագույն միջոցներից է։ Բացահայտեք բոլոր գործընթացները, որոնք կարելի է ավտոմատացնել գործիքների միջոցով։
Հնարավորության դեպքում օգտագործեք Infrastructure as Code և կոնֆիգուրացիայի կառավարման գործիքներ։ Դրանք զգալիորեն նվազեցնում են մարդկային սխալի հավանականությունն ու արագացնում աշխատանքը։
Ճիշտ ներդրման դեպքում ավտոմատացումը կարող է բարելավել RTO-ն մինչև 50%-ով և օպտիմալացնել DR աշխատանքային հոսքերը։
Եթե հնարավոր է, ավտոմատացրեք նաև անցումը պահուստային համակարգին և կապեք այն համակարգի ցուցանիշների հետ։ Խելացի ավտոմատացումը շատ նման առաջադրանքներում գերազանցում է մարդուն։
5. Կանոնավոր թեստավորեք Ձեր BC/DR լուծումները
Սա բոլորից ամենակարևորն է։ Համոզվեք, որ Ձեր բիզնեսի անընդհատության և աղետներից վերականգնման համակարգերն ամբողջ տարվա ընթացքում աշխատունակ են։ Խորհուրդ ենք տալիս դրանք թեստավորել առնվազն տարին 2 անգամ, իսկ ավելի լավ է՝ եռամսյակը մեկ։ Եթե DR պլանի կատարման ընթացքում ինչ-որ բան սխալ ընթանա, RTO-ն զգալիորեն կաճի։ Քանի դեռ լուծումը չի թեստավորվել, չեք կարող վստահ լինել, որ այն աշխատում է։